Ավագ Շաբաթը մեր Տեր Հիսուս Քրիստոսի երկրային կյանքի, ինչպես նաև մեր հոգևոր կյանքի բարձրակետն է, քանզի այս օրերին մեր Տիրոջ հետ պիտի քայլենք դեպի գողգոթայի բարձունքը՝ մասնակից լինելու Նրա չարչարանքներին։ Նա խաչվելու է մեզ համար, մահանալու և հարություն է առնելու մեր փրկության համար, հավիտենական կյանքի անսպառ ուրախությունը մեզ պարգևելու համար։

Ցավոք, Ավագ Շաբաթվա այս նվիրական օրերին չպիտի կարողանանք եկեղեցի հաճախել և մասնակցել եկեղեցական արարողություններին, սակայն աղոթենք տանը, ընթերցենք Ավետարանը և հատկապես Ավագ Շաբաթվա ընթերցվածները և խոկումով ընկերակցենք մեր Տեր Հիսուս Քրիստոսին Իր երկրային կյանքի վերջին օրերին։ Այսու, փարվենք մեր փրկության մեծ խորհրդին, մեր Փրկչի անսպառ սիրուն և անսահման ողորմությանը։