• Մեսրոպ վրդ. Պարսամյան

Նրա ձեռքի հովանու տակ



Սրանից ավել ի՞նչ ապահովություն և պաշտպանություն ենք փնտրում։ Որպես Աստծո զավակներ, մենք միշտ Նրա ամենախնամ պահպանության տակ ենք։ Ուր էլ որ գնանք, ինչ ցավի մեջ էլ որ լինենք, ինչ դժվարության, փորձության և նեղության հանդիպենք, Ամենազոր Աստված պահպանում է մեզ Իր Սուրբ Աջի հովանու տակ։


Աստված տարածում է իր հայրական սիրո գորովագութ խնամքը բոլոր նրանց վրա, ովքեր հաղորդության մեջ են Իր հետ։ Աստծո հովանին հանգստյան վայր չէ, այլ` մշտական բնակության, որտեղ կարող ենք գտնել մխիթարություն և խաղաղություն մեր ալեկոծ հոգիներին։


Ուրեմն, աղոթքի միջոցով և բարի գործերով տևական հաղորդության մեջ լինենք մեր Աստծո հետ, հարատևենք Նրա Ձեռքի հովանու տակ, քանզի այդ հովանու մեջ բնակվողներին և ոչ թե այցելուներին է Տերը խոստանում իր ամենախնամ պահպանությունը։

«Բոլորի պահապան Քրիստոս Աստված մեր. թող Քո Աջը հովանի լինի ինձ վրա. գիշեր և ցերեկ, տանը նստելիս, ճամփա գնալիս, քնած թե արթուն, որպեսզի երբեք չսասանվեմ։ Պահի՛ր և պահպանիր մեզ խաղաղության մեջ Քո սուրբ և պատվական խաչի հովանու ներքո, փրկի՛ր երևելի և աներևույթ թշնամիներից։ Արժանացրու մեզ գոհությամբ փառավորելու Քեզ՝ Հոր և Սուրբ Հոգու հետ, այժմ և միշտ և հավիտյանս հավիտենից. Ամեն»։

  • Grey Facebook Icon
  • Grey Instagram Icon
  • Grey Twitter Icon
  • YouTube

iLooys | Toward the Light

© 2016-2020 Fr. Mesrop Parsamyan. All rights reserved.