top of page

Նարեկ Բան ԽԱ

  • Writer: Bishop Mesrop Parsamyan
    Bishop Mesrop Parsamyan
  • Oct 6, 2020
  • 1 min read


Ո՜վ ամենօրհնյալ Որդիդ Աստծո,

Կենդանարար Հոր անքնին ծնունդ,

Քեզ համար չկա անկարելի ու անհնար ոչինչ.

Բավական է, որ ծագի անստվեր ճաճանչը

փառքի Քո ողորմության,

Որպեսզի իսկույն հալվի ամեն մեղք,

Դևը հալածվի, հանցանքը ջնջվի,

Կապանքը խզվի, խորտակվի շղթան,

Մահացածները կենդանածնվեն,

Խոցը բժշկվի, վերքն առողջանա,

Վերանա ամեն ապականություն,

Թախիծն ընկրկի, ողբը նահանջի,

Խավարը փախչի, մութը վերանա, գիշերը գնա,

Չարիքը չքվի, տագնապն հեռանա,

Հուսահատությունը հալածվի անհետ,

Եվ թագավորի ձեռքդ ամենակալ, քավիչ բոլորի։


Դու, որ եկել ես մարդկային ոգին

Փրկելու, ոչ թե կորցնելու համար,

Փրկիր Քո ժողովրդին

Ամենաառատ Քո ողորմությամբ,

Զի դու ես միայն երկնքում անճառ, երկրում անզնին,

Գոյության բոլոր տարերքների մեջ,

Աշխարհի բոլոր եզրածագերում,

Սկիզբն համայնի և ամեն ինչում՝ ամբողջ լրությամբ,

Օրհնյա՜լ ի բարձունս.

Եվ Քեզ Սուրբ Հոգուդ ու Հորդ հետ փա՜ռք

հավիտյանս, ամեն։


ՆԱՐԵԿ, ԲԱՆ ԽԱ

 
 
 

Comments


  • White Facebook Icon
  • White Instagram Icon
  • LinkedIn
  • X
  • YouTube

iLooys | Toward the Light

© 2016-2024 Bishop Mesrop Parsamyan. All rights reserved.

bottom of page