Գոհություն հայտնենք Աստծուն

Իմաստուններից մեկն ասում է, որ եթե աստղերը ծագեին տարին միայն մեկ անգամ, ապա բոլորն արթուն կմնային ողջ գիշեր՝ զմայլվելու դրանց գեղեցկությամբ։ Արդարև, այնքան հաճախ ենք տեսնում աստղերը, որ դրանք մեզ համար սովորական մի բան են դարձել։

Նույնպես և մեր կյանքի շատ ու շատ օրհնություններ սովորական են դարձել մեզ համար։ Սակայն, եթե մի պահ անդրադառնանք և քննենք մեր կյանքը, ապա այնքա՜ն պարգևներ և օրհնություններ ունենք մեր կյանքում, որոնց համար պետք է գոհանանք Աստծուց և ի խորոց սրտից ասենք. «Շնորհակալություն»։

Ծնողները լավ գիտեն երախտագիտության զորությունը։ Երբ երեխաներն անվերջ խնդրում են՝ առանց շնորհակալ լինելու իրենց ունեցածի համար, բնականաբար մի օր տրտմում է ծնողի սիրտը։ Իսկ երբ խնդրանքն ուղեկցվում է երախտագիտության զգացումով, այդժամ ծնողի սիրտը քաղցրանում է, ուրախանում, իսկ նվերները՝ առատանում։

Ուրեմն, գնահատենք այն օրհնությունները, որ ունենք մեր կյանքում և «ամեն ինչի համար մեր Տեր Հիսուս Քրիստոսի անունով միշտ գոհությո՛ւն հայտնեք Հայր Աստծուն»։ (Եփեսացիներին 5:20)