top of page
Search

Աղոթք ռազմագերիների համար

  • Writer: Bishop Mesrop Parsamyan
    Bishop Mesrop Parsamyan
  • Nov 29, 2020
  • 1 min read


Ամենագութ և ամենողորմ Աստված, որ Միածին Որդուդ ուղարկեցիր՝ աղքատներին ավետարանելու, սրտով բեկյալներին բժշկելու և գերիներին ազատություն քարոզելու, աղաչում ենք քեզ, ազատություն պարգևի՛ր գերեվարված մեր զինվորներին։


Աստվածային Քո իմաստությունը պարգևիր բոլոր պատասխանատու անձանց, որպեսզի օր առաջ կարողանանք ճանապարհներ գտնել մեր գերիներին ապահով և անհապաղ տուն վերադարձնելու համար։


Քո խաղաղության հրեշտակին ուղարկիր, որպեսզի զորացնի բոլոր այն ծնողներին, ովքեր սրտի թրթիռով սպասում են գերեվարված կամ անհայտ կորած զինվորների վերադարձին և նրանց պարգևիր ուրախությունը տեսնելու իրենց զավակների վերադարձը։


Արդ խնդրում ենք Քեզ բարերար և բազումողորմ Աստված, մեր գերյալ եղբայրներին քաջություն և ոգու արիություն պարգևիր, լցրու նրանց սրտերը ազատության հույսով և այն գիտակցությամբ, որ նրանք մոռացված կամ անտեսված չեն և որ անհամբեր սպասում ենք նրանց վերադարձին։


Ի խորոց սրտից աղոթում ենք և հավատում, ամենակալ Տե՛ր Աստված, որ ազատություն պիտի պարգևես և ապահով տուն վերադարձնես մեր գերյալ եղբայրներին և նրանց հետ միասին բոլորս գոհությամբ պիտի փառավորենք Ամենասուրբ Երրորդությունդ՝ Հորը, Որդուն և Սուրբ Հոգուն, այժմ և միշտ և հավիտյանս, հավիտենից. ամեն։


Մեսրոպ վարդապետ Պարսամյան

 
 
 

Comments


  • White Facebook Icon
  • White Instagram Icon
  • YouTube
  • LinkedIn

iLooys | Toward the Light

© 2016-2024 Bishop Mesrop Parsamyan. All rights reserved.

bottom of page